Sognefjorden

Statnett er i gang med å strekkje leidningar over Sognefjorden. Dette fjordspennet blir det lengste i verden på 420 kV. Arbeidet vil i liten grad råke grunneigarar og fastbuande, men vil påverke skipstrafikken. Les meir om dette her.

I samband med strekking av nye liner blir det etablert ein seglingskorridor på vestsida av Sognefjorden, sidan straumlina i periodar må liggje på sjøen. Alle fartøy skal passere gjennom seglingskorridoren. Det blir sett ut ei grøn lysbøye på vestsida av fjorden for å markere kor nær land båtane kan gå.

I desse periodane (inntil tre dagar) vil det alltid liggje vaktbåtar i nærleiken for å rettleie alle typar fartøy trygt gjennom seglingskorridoren.

Det er sett opp oppslag i småbåthamner, og arbeidet er meldt inn i EFS. Statnett har tett dialog med hamner og lostenesta for å sikre ei trygg gjennomføring av arbeidet. 

Fylkesveg 5602 Fresvikvegen kan i nokre tilfelle få avgrensingar når straumleidninga skal strekkjast over fjorden. Det vil bli gjennomført manuell trafikkdirigering og skilting.

Fjordspennet som no blir etablert, skal erstatte fjordspennet som heng litt lenger nord, og er ein del av straumnettet mellom Sogndal og Vik kommune. Det gamle fjordspennet er planlagt rive i 2027/28, etter at det nye er sett i drift.

Alpastølen – Vines – Fimreite – Bjørnstigkamben  

For å styrkje straumforsyninga mot Bergensområdet vil det vere arbeid med bygging av ei ny 420 kV-leidning på Fimreiteåsen gjennom heile sommaren.

Vidare nordover skal ein del av straumleidninga fram til Sogndal stasjon ferdigstillast i løpet av sommaren og setjast i drift saman med den eksisterande leidninga. Delstrekninga mellom Fimreite og Sogndal vil bli driven på 300 kV fram til Vik–Ramnaberg-prosjektet og Vik transformatorstasjon er bygde.

Sjølv om kapasiteten i overføringa ikkje kan takast fullt ut i bruk før alt er oppgradert, vil driftstryggleiken auke. Dette er også avgjerande for at vi til hausten kan starte rivinga av den gamle leidninga og fjordspennet ved Fardal

Aurlandsfjellet  

Rivinga av den gamle 300 kV-leidninga mellom Aurland og Sogndal er godt i gang. Transport av mastestål frå lagringsområda vil halde fram. Alt gammalt stål og alle liner vil bli sende til resirkulering.

Aurland stasjon, Vassbygdi 

Det vil vere arbeid inne på stasjonen gjennom heile sommaren. Materiell og utstyr vil bli transportert inn til stasjonen dagleg.

Støyande aktivitet 

Dei fleste aktivitetane inneber behov for sprenging og bruk av helikopter, noko som vil medføre ein del støy.

Statnett varslar med dette om sporadisk sprenging i samband med arbeidet som skal gå føre seg. Bruk av eksplosiv vil bli varsla på førehand med signal.

I samband med den pågåande aktiviteten vil Statnett sine entreprenørar varsle politiet om arbeidet. Varslingsrutinane er i tråd med gjeldande regelverk.

Det vil vere mykje anleggstrafikk og bruk av helikopter i samband med bygginga av den nye 420 kV-linja mellom Sogndal og Vik (Hove), og oppgraderinga av Aurland stasjon.

Statnett beklagar ulempene og støyen som vil oppstå som følgje av anleggsaktiviteten.

 

Registrer deg som abonnent på nyheitsvarsel for prosjektet for å få melding om oppdateringar.